Ես չգիտեմ՝ Ս. Սարգսյանը նարկոման է, թե ոչ, բայց նույնիսկ հավաքարարը նման բան չէր հայտարարի – Armenian Renaissance  

«Հայկական վերածնունդ» կազմակերպության Փարիզի մասնաճյուղի համակարգող Շանթ Ոսկերչյանը անցյալ տարվա մայիսին փորձել էր Փարիզից Երևան ժամանել, սակայն իրավապահները նրան 12 ժամ հարկադրաբար պահել էին «Զվարթնոց» օդանավակայանում, ապա ետ ուղարկել:

Հետագայում պարզվեց, որ հայցվորի մուտքը Հայաստանի Հանրապետություն արգելվել է ՀՀ ազգային անվտանգության կողմից, քանի որ նրա տվյալները ներառվել են Հայաստանի Հանրապետության տարածքում անցանկալի համարվող օտարերկրացի քաղաքացիների բանկում: Տեղի ունեցածի հետ կապված դատական գործ բացվեց, հուլիսի 6-ին հերթական նիստն է վարչական դատարանում: Ոսկերչյանի իրավունքները պաշտպանող իրավաբանները պատրաստվում էին հայաստանյան ատյանները սպառելուց հետո դիմել Եվրոպական դատարան, սակայն վերջերս հանվեց Ոսկերչյանի Հայաստան մուտքի արգելքը:

Օրերս նա Հայաստան է ժամանել, որի առիթով զրուցել ենք ֆրանսահայ գործչի հետ:

– Պարոն Ոսկերչյան, նախորդ տարի ձեզ հետ տեղի ունեցած միջադեպից հետո առաջին անգամ եք Հայաստանում: Ի՞նչ ծրագրեր ունեք:

– Ինձ համար անսպասելի էր այդ որոշումը, որ անունս հանեցին սև ցուցակից: Որևէ հիմք, պատճառ նշված չէր, թե ինչու են մտցրել այդ ցուցակ, ինչու հանեցին: Բայց կարծում եմ, որ Ֆրանսիայի հայկական համայնքի ներկայացուցիչների, փաստաբանների, իրավաբանների ճնշումները, հաղորդագրությունը դեր խաղացին: Ես հիմա չափազանց ուրախ եմ: Դուք չեք կարող պատկերացնել, թե ինչ է նշանակում 1 տարի չլինել Հայրենիքում: Ես սովորաբար տարին 2-3 անգամ գալիս-գնում եմ Հայաստան: Ինձ համար այստեղ դրախտի պես մի տեղ է: Ես եկել եմ նախևառաջ այս օդը շնչելու համար, ինձ համար հաճույք է փողոցում քայլելը, գնալ-գալը, իմ ընկերների հետ շփվելը: Իմ ընկերներն են՝ Ժիրայր Սեֆիլյանը, Գարեգին Չուգասզյանը, Վարուժան Ավետիսյանը, Րաֆֆի Հովհաննիսյանը եւ ուրիշներ…«Նոր Հայաստան» ճակատը:

– Եվ որքա՞ն ժամանակ եք այստեղ լինելու:

– Մայիսի 31-ին պիտի վերադառնամ  Փարիզ: Ցավոք չեմ կարող ավելի երկար մնալ: Միջոցառում ենք պատրաստել այնտեղ Ղարաբաղի թեմայով: Հունիսի 8-ին է լինելու, միջազգային իրավաբանների, լրագրողների մասնակցությամբ:

– Ժիրայր Սեֆիլյանենց շարժման հետ այստեղ որևէ հրապարակային միջոցառում չի՞ նախատեսվում:

– Չգիտեմ, ես հավանաբար վաղը հանդիպեմ իր հետ: Չեմ կարծում, որ միջոցառում կանենք:

– Քանի որ այդպես էլ մինչև վերջ չպարզվեց ձեզ Հայաստանից արտաքսելու պատճառը՝ շարունակելո՞ւ եք դատական պրոցեսը: Մարդու իրավուքների եվրոպական դատարան դիմելու հայտարարությունը ուժի մե՞ջ է:

– ՄԻԵԴ դիմելու համար Հայաստանում պետք էր գնալ մինչև Վճռաբեկ: Գործը դրան չհասավ: Արդեն երկրորդ դատի ժամանակ ԱԱԾ-ն հանեց իր որոշումը, այսինքն հիմա պատճառ չունեմ Եվրոպական դատարան գնալու: Իսկ իմ նկատմամբ իրականացվածի պատճառը հասկանալու համար դատավարությունը շարունակվում է: Եվ իրավաբանները պահանջել են ինձ պատճառված վնասի փոխհատուցում:

– Մի փոքր անդրադառնանք քաղաքական իրավիճակին: Երեկ վերջնականապես ընդունվեց ՀՀ նոր ընտրական օրենսգիրքը: Ի՞նչ եք կարծում, ի՞նչ է սպասվում 2017 թվականի ընտրություններից առաջ Հայաստանում: Դուք և ձեր կառույցը որևէ կերպ մասնակցություն կունենա՞ք այստեղ տեղի ունեցող պրոցեսներին:

– Մենք ի սկզբանե ասել ենք, որ Հայաստանում ընտրություններով հարց չի կարող լուծվել: Այն, ինչ տեղի է ունենում՝ կարելի է ասել նաև չընտրություն: Տեղի ունեցողը խայտառակություն է, Հայաստանի ժողովրդի քվեների բռնազավթում: 25 տարի է՝ դուք ընտրում եք մեկին, ԿԸՀ-ն մեկ ուրիշին է նախագահ հայտարարում, նույն բանը տեղի է ունենում խորհրդարանում: Եվ ես վստահ եմ, որ օրենքը փոխվի, չփոխվի, նույն համակարգը կշարունակվի: Այսինքն քվեատուփերով դեռ որևէ բան փոխել ցավոք սրտի հնարավոր չէ: Դեմոկրատական երկրներում այո, հնարավոր է: Օրինակ, մենք Ֆրանսիայում փոխում ենք, աջերը գնում են ձախերն են գալիս, ու հակառակը: Բայց այդտեղ չի փոխվում: Շատ-շատ սկսում են կուսակցության անունը փոխել: «Օրինաց երկիրը» մեր կազմակերպության անունը գողացավ, դրեց իր կուսակցության վրա, որպեսզի իշխանություն ունենալու փորձ անի: Բայց չեմ կարծում, որ Հայաստանի ժողովուրդը անգրագետ է և չի տեսնում, որ այդ «Օրինաց երկիրը» դարձավ «Հայկական վերածնունդ»: Ժողովուրդը գիտի, որ անուն փոխելով քաղաքականություն չի փոխում: Ամեն մարդ գիտի, թե Արթուր Բաղդասարյանը ինչ գործարքների մեջ է իշխանությունների հետ, ինչ վատ գործեր է արել Հայաստանում: Նույնը ուրիշները: Մանր-մունր կուսակացություններ են ստեղծում, բայց ոչինչ չի փոխվում Հասյաստանի քաղաքական դաշտում:

– Այսինքն 2017-ի ընտրությունների միջոցով էլ հնարավոր չեք համարում որևէ փոփոխություն:

– Չէ, չէ, 2017-ի վրա ես հույս չունեմ: Մեզ համար ճիշտն այն է, որ Հայաստանի ժողովուրդը ոտքի կանգնի, միահամուռ, ինչպես 1988-ին, տապալի այս իշխանությունը: Սրանք իշխանություն չեն: Տեսեք, ինչ անմակարդակ հայտարարություն արեց Հայաստանի երրորդ չընտրված նախագահը ինքնաթիռի մեջ: Ես չգիտեմ ինքը նարկոման է, թե ոչ, բայց էդպիսի հայտարարություն….նույնիսկ փողոցի հավաքարարը չի կարող էդպիսի հայտարարություն անել: Ասաց՝ մենք 800 հեկտար տարածք ենք կորցրել, ոչինչ, էդքան կարևոր տարածքներ չէին: Հիմա էլ ասում է՝ ով ուզում է, թող գնա հետ վերցնի: Դա նախագահի, ողջամիտ մարդու ասելի՞ք է: Անհնարին է: Մենք այդ տարածքների համար 100 երիտասարդ զինվոր զոհեցինք, եթե ուզում էին հանձնել, թող առանց պայքարելու հանձնեին, թող առանց կռվի տային: Այս պատճառով ես կարծում եմ, որ Հայաստանի երրորդ նախագահ կոչվածը պատասխանատվության պիտի ենթարկվի հողերը հանձնելու համար, մեղմ ասած դավաճանական վերաբերմունքի համար: Եթե Հայաստանի դատաիրավական համակարգը ծախված է իրեն, իրեն չեն կարող դատել, բայց դրսում կարող ենք միջազգային ատյաններ դիմել և դատի կանչել հողերը հանձնելու համար: Եթե մենք Ադրբեջանից մի քիչ, մի քիչ հող վերցրած լինեինք, այսօր մենք պատերազմ կունենայինք: Ամեն անգամ, երբ մեր բանակը առաջ է գնում, հետևից հրամանով կասեցնում են: Չի լինի էդպես, պիտի այս հարցը մեկընդմիշտ լուծել, իրենց ծունկի բերել: Չէ՞ որ մենք այդ կարողությունը ունենք, բայց չենք անում, քանի մեր այսօրվա ղեկավարները հայ ժողովրդի շահերը չեն պաշտպանում, օտարների շահերն են պաշտպանում, և իրենց գրպաններն են պաշտպանում: Մեզ պետք են լեգիտիմ իշխանություններ:

– Ապրիլայն պատերազմի օրերին հայ ժողովուրդը նորից համախմբվեց, մի տեսակ միասնակություն եղավ, Հայաստանից հեռացածներն անգամ սկսեցին վերադառնալ: Ձեր կարծիքով իշխանություններն այս ամենից հետևություն չե՞ն արել. վերջերս կոռուպցիայի դեմ նոր պայքար են հայտարարել:

– Ղարաբաղի հարցը շատ զգայուն հարց է, մասնավորապես սփյուռքի համար: Բայց այդ միասնությունը, որ եղավ, իշխանությունը դա ներկայացնում է այնպես, կարծես թե իր շուրջ  է եղել: Ոչ, Հայաստանի ժողովուրդը, ես վստահ եմ, որ թքած ունի այդ իշխանությունների վրա և գիտի, թե ինչ երկու ոտքով չորքոտանիներ են դրանք: Միասնականությունը հայրենի հողի համար էր և ոչ թե իշխանությունների: Իշխանությունը կապ չունի: Եվ նրանք ի՞նչ հետևություն պետք է անեն: Կոռուպցիան անողն իրենք են: Կոռուպցիայի դեմ պայքարելու համար անկախ մարդիկ պետք է գան: Իսկ իրենք իրենց մարդկանց են նշանակում: Բայց իհարկե հայրենիքը պետք է պաշտպանել՝ անկախ իշխանություններից և ես անձամբ գրանցվել եմ Շուշիի առանձնակի գումարտակի ազատամարտիկների միության կամավորների ցուցակում:

– Այսինքն պատրաստ եք անհրաժեշտության դեպքում գնալ և պայքարել՝ գրավված տարածքները հետ վերադարձնելու համար:

– Այո: Թեկուզ զինվորական պատրաստություն չունեմ, բայց կարող եմ գնալ և երկրորդ, երրորդ գծերի վրա իմ օգնությունը ցուցաբերել:

Նկարում՝ Շանթ Ոսկերչյանը՝ բարձրախոսով:

Աղբյուր՝ http://armtimes.com/hy/read/86285

Los Angeles Chapter

Leave a Comment

Սոցիալական Ցանցերում

Ֆեյսբուք

Մոտակա Միջոցառումները

No results found.